نصائح مهمة جدا وانت بتشتري تليفون مستعمل 😊

1- الشكل الخارجي:
 تفحص التليفون كويس جدا من بره وتركز ع الزوايا عشان تعرف واخد خبطات جامدة ولا لأ وعشان أحيانا ممكن يكون فيه شرخ في الضهر ، وتركز ع الشاشة كويس جدا لو مفيش عليها اسكرينه تفحصها والتليفون مقفول وتميل التليفون بزاوية تخلي الإضاءة تعكس عليه عشان لو فيه خدش جامد في الشاشة.

 2- فحص الهاتف من الداخل:
 تخلع الضهر وتبص على كل المسامير بتاعة التليفون وتعكس عليها النور عشان لو المفك معلم فيها ، وتتأكد من ريش البطارية وانهم ميكونش فيهم ريش متصلبة او معوجة.
 3- فحص البطارية من الخارج:
 أحيانا بتكون البطارية (منفخة) و دي عشان تعرفها تحط البطارية على سطح مستوي زي لوح ازاز مثلا وتشوف البطارية لو ضغطت عليها من الأجناب هتروح وتيجي معاك ولا ثابتة ولو ثابتة تبقى سليمة ، وكمان تبص ع الجزء النحاسي اللي في البطارية وتشوفه سليم ولا محكوك بمفك أو اله حادة.
 4- فحص الأزرار:
 تفحص الأزرار من الخارج بإنك تضغط عليها وتسمع صوت الضغطة وتحس بالضغطة وتشوف ليها صوت ولا مكتومة لأن الضغطة دي لو مكتومة ممكن الزرار بيوظ بعد فترة من استخدامك ، وكمان تفحصها من الداخل بأنك تشيل الضهر وتشوف ضغطتها من غير الضهر.
 5- سرعة تشغيل وغلق الجهاز:
 لو حسيت ان الجهاز بياخد وقت أكتر من الطبيعي وانت بتشغله أو تقفله متشتريهوش.
 6- مدخل الشاحن والسماعات:
 توصل الشاحن بالكهرباء وبعدين توصل كابل الشاحن بالتليفون وتشوف استجابته للشحن هل بيشحن على طول ولا محتاج تحرك الشاحن في السوكت عشان يشحن ونفس الكلام في السماعات.
 7- اختبار الشبكة:
 لو التليفون بخطين حط فيه خطين وشوف الشبكة فيه عاملة ازاي لو أقل من الطبيعي اوعى تشتريه وعشان تتأكد ان الشبكة سليمة قارنها بتليفونات تانية موجودة بنفس المكان وعلى نفس الشبكات.
 وانت بتعمل بيه مكالمة بتشيل التليفون من على ودنك وتلمح الشبكة فيه هل أقل من الطبيعي ولا لأ.
 8- اختبار بطاقة الذاكرة:
 لو التليفون بيقبل ميموري كارد تجرب تحط فيه ميموري وتشوفه هيقراه ولا لأ.
 9- إختبار المكالمات:
 ده اهم شيء في التليفون انك تعمل بيه مكالمة مع أي حد انت تعرفه وتكلمه بصوت واطي واضح وتشوف هيقولك مش سامعك ولا صوتك مكتوم ولا ايه بالضبط وتكلمه برده وانت فاتح السبيكر عشان بعض التليفون بيبقى فيها خاصية Active noise cancellation with a dedicated mic فبيكون المستقبِل اللي انت بتكلمه بيسمعك بشكل مختلف وانت فاتح السبيكر.
 وكمان تشوف سماعة المكالمات انت سامع منها كويس ولا لأ وتخلي اللي بيكلمك يكلمك بصوت واطي عشان تتأكد انها سليمة وان صوته واضح ومش مكتوم.
 10- فحص الشاشة:
 تفتح التليفون وتعلي الإضاءة على الأخر وتقف في مكان متكونش فيه الإضاءة عالية وتفحصها كويس ولو لقيت فيها بكسلات او نقط صغيرة لونها أبيض أو أخضر أو أحمر في الخلفية السوداء اوعى تشتريه.
 كمان تفحص الشاشة في خلفية لونها أبيض وتركز كويس جدا وانت في مكان الإضاءة فيه ضعيفة عشان تتأكد ان الشاشة مفيهاش بقع صفراء.
 وتحاول تستخدم التليفون فترة طويلة عشان البقع الصفراء ممكن تظهر لما الجهاز يسخن شوية.
 11- إختبار التاتش:
 و ده بيبقى عن طريق تطبيق بيختبر نقط التاتش ولو التطبيق ده مش موجود افتح رسالة واكتب وشوف الإستجابة واستخدم اصبعين وانت بتكتب عشان تشوف الإستجابة سليمة ولا بتختلف مع نقطتين تاتش.
 12- الكاميرا الأمامية والخلفية:
 تجرب تصور بالكاميرا وتشوفها مهزوزة ولا ثابتة عشان الخبطات الجامدة جدا ممكن تخلي صورة الكاميرا مهزوزة وانت بتصور بيها وطبعا تجرب الفلاش وتفتحه وتبص في الفلاش جامد لو عينيك موجعتكش يبقى الفلاش ده ضعيف ومش في حالته الطبيعية.
 الكاميرا الأمامية نفس الكلام.
 13- اختبار صوت الجهاز:
 تجرب تشغل نغمات صوتها عالي ويفضل تكون ملفات صوت انت عارفها وعارف مدى نقاءها ومدى ارتفاع صوتها وتشوف هل فيه Noise او وَشْ في السماعة ولا لأ.
 14- سنسور المكالمات:
 المستشعر ده اسمه Proximity Sensor وده عبارة عن ان الشاشة بتطفي أول ما بتحط التليفون على ودنك ، تتأكد انه شغال لو هو اصلا موجود في التليفون.
 15- سنسور الإضاءة التلقائي:
 هل الإضاءة لو معمولة Automatic بتعلى و توطى ولا لأ.
 16- البلوتوث والواي فاي:
 لو فيه مشكلة هاردوير في ايِ منهم هيظهرلك رسالة خطأ لو بتحاول تعمل اقتران مع بلوتوث أو بتحاول توصل بشبكة واي فاي.
 17- اكسسوارات التليفون:
 لو التليفون معاه كل حاجته يبقى المفروض تبقى عارف كل الإكسسورات اللي بتيجي مع التليفون وتشوفها كلها موجودة ولا لأ والحاجة اللي مش موجودة تنزل من سعره على طول.
 وتتأكد ان كل الإكسسورارت شغالة كويس وخاصة السماعات ميكونش فيهم فردة صوتها أوطى من التانية وتتأكد انها أصلية ودي بتبان من خامة الإكسسورات دي وصوتها في السماعات.
 18- تجربة التليفون مدة 24 - 48 ساعة:
 لو فيه امكانية انك تجرب التليفون يوم او اتنين يبقى تتفق مع اللي هيبعهولك وفي اليومين دول متسبش التليفون من ايديك عشان لو ظهر فيه عيب وعشان تشوف اداء البطارية.
 19- يفضل وجود فاتورة أو شهادة ضمان:
 عشان ع الأقل تعرف التليفون ده مستخدم بقاله قد ايه ، حتى لو الضمان منتهي فإنت بتعرف بقاله كام شهر او كام سنة مع صاحبه.
 20- تنازل من صاحب التليفون:
 لو التليفون ده من غير علبة أو فاتورة أو شهادة ضمان يبقى تكتب تنازل ، بيبقى زي عقد ما بين طرفين وعبارة عن ان الطرف الأول واسمه كذا وتكتبه زي اللي في بطاقته وتكتب رقمه القومي باع للطرف الثاني اللي هو انت وتكتب اسمك ورقمك القومي هاتف ماركته كذا وموديله كذا ورقم السيريال الخاص بيه كذا ولونه كذا بسعر كذا وتكتب السعر بالحروف والأرقام وفي يوم كذا وتكتب التاريخ بالحروف والأرقام ، وفي الأخر تكتب الطرف الأول ويمضي هو عليه وتبصمه لأن البصمة مهمة جدا وتمضي انت كمان كطرف ثاني وتقفل التنازل بإنك بتشد خطوط بالطول او العرض على الجزء الفارغ في صفحة التنازل بحيث ان مش ممكن يتعدل او ينضاف عليه اي بند ولو هو عايز صورة من التنازل اديله مفيش مشكلة وتخلي معاك الأصل.
 ده عشان يضمن حقك لو التليفون مسروق الشرطة تجيبه من قفاه وتجيبلك فلوسك منه ويبقى مفيش عليك أي ضرر او مسؤلية أحسن ممكن تُتهم بسرقة التليفون من صاحبه الأصلي.
لو كل واحد بيشتري ركز في الحاجات دي عمره ما هينضحك عليه و ع الأقل لو فيه عيب هو لاحظه يبقى هياخد التليفون على عيبه ويقلل من سعره حسب ما يُرضي الطرفين.